Universal News Network
The Universal News Network

جنوبی وزیرستان میں صحت یاب ہونے پر کرونا مریض کا والہانہ رقص

وانا: ڈی ایچ کیو وانا میں زیر علاج کو وِڈ نائنٹین کا مریض صحت یاب ہو گیا، گھر جاتے ہوئے معمر مریض نے والہانہ رقص شروع کر دیا۔

5

کرونا وائرس کا جتنا خوف ہے اس سے صحت یاب ہونے کی خوشی بھی اتنی ہی زیادہ ہوتی ہے جس کا مظاہرہ خیبر پختون خوا کے ضلع جنوبی وزیرستان کے علاقے شکئی کے رہایشی موسم خان نے روایتی رقص اتنڑ کے ذریعے کیا۔

تبلیغی جماعت سے وابستہ موسم خان کو کرونا وائرس کی علامات کے بعد ڈسٹرکٹ ہیڈ کوارٹر اسپتال وانا میں قائم قرنطینہ مرکز منتقل کیا گیا تھا جہاں پر ان کا ٹیسٹ کرایا گیا تو وہ کرونا پازیٹو آیا جس کے بعد انھیں مکمل آئیسولیشن میں رکھا گیا۔

خیبر پختون خوا کے ضلع جنوبی وزیرستان کے علاقے شکئی کا رہایشی موسم خان قرنطینہ مرکز سے باہر آتے ہوئے
آئسولیشن پیریڈ مکمل کرنے کے بعد آج موسم خان کے کرونا ٹیسٹ کا نتیجہ منفی آ گیا اور انھیں صحت یاب قرار دے کر گھر جانے کی اجازت دی گئی، وہ قرنطینہ مرکز سے نکل کر گھر جانے لگے تو کھلی ہوا میں سانس لیتے ہوئے خوشی کے مارے روایتی قبائلی رقص اتنڑ شروع کر دیا، تصویر میں دیکھا جا سکتا ہے کہ ان کے گلے میں دولھے کی طرح پھولوں کا ہار بھی پڑا ہوا ہے۔

اسسٹنٹ کمشنر وانا امیر نواز کرونا وائرس سے متاثرہ موسم خان کی صحت یابی پر گفتگو کرتے ہوئے
موسم خان کو رقص کرتے دیکھ کر ان کے ساتھ موجود محکمہ صحت کے اہل کار بھی اتنڑ میں شامل ہو گئے، اسسٹنٹ کمشنر وانا امیر نواز نے کرونا وائرس سے متاثرہ موسم خان کی صحت یابی کو ایک بڑی کامیابی قرار دیتے ہوئے کہا کہ ڈی ایچ کیو وانا کے ڈاکٹر انتہائی قابل ہیں جو کرونا مریض کا علاج کرنے کی قابلیت رکھتے ہیں۔

ان کا کہنا تھا کہ وہ قرنطینہ مرکز وانا کے تمام اسٹاف کو سیلوٹ پیش کرتے ہیں جن کی محنت سے آج موسم خان کا ٹیسٹ منفی آیا ہے، حکومتی احکامات پر عمل کر کے کرونا کو شکست دی جا سکتی ہے۔

جواب چھوڑیں

آپ کا ای میل ایڈریس شائع نہیں کیا جائے گا.